БИШКЕК, 17-сен. — Sputnik. Укук коргоо органдары тарабынан 2018-жылдан тарта жана быйылкы жылдын сегиз айына чейинки мезгилде Кылмыштардын жана жоруктардын бирдиктүү реестрине коррупцияга, кызматтык кылмыштарга байланышкан 6 541 сотко чейинки өндүрүш катталган. Бул туурасында Башкы прокурор Өткүрбек Жамшитов Коопсуздук кеңешинин жыйынында маалымат берип жатканда айткан.
Жогоруда келтирилген фактылардын ичинен 1 576 кылмыш иши боюнча тергөө аяктаган. Соттук кароого 965 жазык иши жөнөтүлгөн
"Көрсөтүлгөн убакытта кызматтык жана коррупциялык кылмыштарга байланышкан жазык иштер боюнча мамлекеттик бюджетке 5 миллиард 826 миллион сом өндүрүлгөн", — деп айтылат маалыматта.
Айлык аз деп айткандан уялгыла! Жээнбеков күч структура өкүлдөрүн зекиди
Мамлекетке келген зыяндын өлчөмү жана анын өнгөн суммасы:
- 2018-жылы — 3 млрд. 209 млн. 770 миң сом, анын 2 млрд. 149 млн. 735 миң сому өндүрүлгөн.
- 2019-жылы — 9 млрд. 734 млн. 526 миң сом, анын 3 млрд. 144 млн. 853 миң сому өндүрүлгөн;
- 2020-жылдын 8 айында 706 млн. 419 миң сом, анын ичинен 532 млн. 99 миң сому өндүрүлгөн.
"Кыргызстанда соттор тарабынан 2,5 жылдын ичинде кызматтык же коррупциялык кылмыштарды жасагандары үчүн 648 адам сот жообуна тартылды. Аталган адамдар тарабынан соттун өкүмдөрүнүн негизинде 334 миллион 519 миң сом өндүрүлгөн", — деп айтылган маалыматта.
Жээнбеков: бюджетти тоноп, кызматын пайдаланып байыгандарга аёо болбойт
Эске салсак, бүгүн президент Жээнбековдун катышуусунда Коопсуздук кеңешинин жыйыны өтүп, анда эки маселе каралган. Биринчиси — укук коргоо органдарынын өлкөдөгү коррупциялык көрүнүштөр менен күрөшүү боюнча иштеринин жыйынтыгы. Экинчиси — 2021-2024-жылдарга карата КРде коррупцияга каршы күрөшүү жана анын себептерин жоюу боюнча жаңы мамлекеттик стратегиянын долбоору.
