Жээнбеков: коррупцияга каршы күрөшүүнүн 82 ыкмасы иштелип чыкты

Жазылуу
Мамлекет башчы жемкорлукка аралашкан чиновниктер саат сайын жаңы коррупциялык механизмдерди ойлоп таап жатканын айтты.

БИШКЕК, 17-сен. — Sputnik. Коопсуздук кеңешинде Антикоррупциялык жаңы стратегия түзүлдү. Бул туурасында мамлекет башчынын маалымат кызматы билдирди.

Коопсуздук кеңешинин катчысы Дамир Сагынбаев 2021-2024-жылдары коррупцияга каршы аракеттенүү жана анын кесепеттерин жоюу боюнча мамлекеттик стратегиянын долбоору менен тааныштырган.

Жыйында президент Сооронбай Жээнбеков бул стратегия акыркы жылдары жасап жаткан иштин ырааттуу уландысы болууга тийиш экенин баса белгиледи.

"Коррупцияга аралашкан чиновниктер өздөрүн бүтүндөй мамлекетке каршы коюп, саат сайын бизге чакырык таштап, улам жаңы коррупциялык механизмдерди ойлоп табышууда. Биз антикоррупциялык мыйзамдарды тынбай жакшыртып турууну улантышыбыз керек. Бул тармактагы эл аралык мыкты тажрыйбаны иликтеп, талдап туруубуз зарыл. Эң жакшы ыкмаларды жана антикоррупциялык механизмдерди биздин күнүмдүк ишибизге колдонууга киргизиш керек", — деди Жээнбеков.

Жээнбеков: бюджетти тоноп, кызматын пайдаланып байыгандарга аёо болбойт

Ошондой эле президент стратегиянын жаңы долбоорунда 82 конкреттүү антикоррупциялык иш-чара иштелип чыкканын белгиледи. Аны ишке ашыруу үчүн 2024-жылга чейин мөөнөт берилгени айтылат.

Соңунда Жээнбеков коррупция менен күрөшүүдө жарандардын колдоосу маанилүү экенин кошумчалады.

Жаңылыктар түрмөгү
0