БИШКЕК, 24-авг. — Sputnik. Парламенттик шайлоого катышуу үчүн анын күрөөсүн төккөн 16 партиянын тизмеси жарыяланды. Маалыматты Sputnik агенттигине Борбордук шайлоо комиссиясы жиберди.
Эске салсак, буга чейин БШКга талапкерлердин тизмесин 17 партия тапшырса, анын ичинен бирөө 5 миллион сомдук шайлоо күрөөсүн төлөгөнү тууралуу документи жок болуп чыккан. Натыйжада 16 партия тиешелүү талаптарды так аткарган.
- "Кыргызстан";
- "Биримдик";
- "Афганистан согушунун ардагерлери жана ушул сыяктуу кагышууларга катышкандардын саясий партиясы";
- "Бир бол";
- "Республика";
- "Ата Мекен";
- "Мекенчил";
- "Мекеним Кыргызстан";
- "Замандаш";
- "Социал-демократтар";
- "Реформа";
- "Чоң казат";
- "Ыйман нуру";
- "Ордо";
- "Бүтүн Кыргызстан";
- "Мекен ынтымагы".
Белгилей кетсек, социалдык тармактарда "Кыргызстан" партиясы шайлоого катышпайт деген сөздөр тараган. Борбордук шайлоо комиссиясынын мүчөсү Кайрат Осмоналиев Sputnik агенттигине партиянын айрым документтери жетпей калганын, бирок мыйзам боюнча аны толуктаганга убактысы бар экендигин билдирди.
"Кыргызстан" партиясынын документ тапшырганы журналга түшүрүлгөн. Эң акыркы келип тапшырышкан. Айрым документтери толук эмес экен. Мыйзам боюнча, документтер бир күндүн ичинде каралат. Эгер кагаздар толук эмес болсо, артка кайтарабыз, ал эки күндүн ичинде толукталышы керек. Ошондой эле каттоо боюнча чечимди комиссия кабыл алат. Маселен, 8-12 добуш алса, партия каттоодон өтөт", — деди Осмоналиев.
Алдыда эмне болот? Шайлоонун орчундуу даталары жана этаптары тууралуу маалымат
Жогорку Кеңештин депутаттарын шайлоо быйыл 4-октябрда болот. Ага чейин кандай этаптардан өтүү талап кылынат жана шайлоодон кийинки кадамдар тууралуу Sputnik Кыргызстандын маалымдамасынан окуңуздар.
