БИШКЕК, 6-авг. — Sputnik. Милдеттүү медициналык камсыздандыруу фондунун төрайымы Элнура Боронбаева өлкөдө дары-дармек менен камсыз кылуу боюнча кырдаал турукташып калганын, бирок айрым препараттар тартыш болуп жатканын брифингде маалымдады.
Анын айтымында, өлкөдө азыр төмөнкү дарылар тартыш болууда:
- надропарин (фраксипарин)
- натрийдин эноксапарини
- кларитромицин
- пиперациллин-тазобактам
- мидазолам.
Булар коронавирус жана пневмония илдетинин оор жана өтө оор формаларын дарылоо үчүн зарыл.
"Бүгүнкү күндө саламаттык сактоо уюмдарында акча каражаты жетиштүү. Дары-дармек каражаттары жана медициналык буюмдар менен камсыз кылуу департаментинен билдиргендей, бардык дары-дармек Кыргызстандын рыногунда бар. Ушуга байланыштуу саламаттык сактоо уюмдарынын жетекчилерине кайрылып кетким келет. Колдо болгон ресурстарды пайдаланып, калкты дары-дармек, дезинфекциялоочу каражат жана медициналык буюмдардын запасы менен камсыз кылыңыздар", — деди Боронбаева.
Ал жыл башынан тартып медиктердин компенсациялык төлөмдөрүн жүргүзүүгө 623,8 миллион сом төлөнүп берилгенин кошумчалады.
