БИШКЕК, 30-июл. — Sputnik. Ош облусунда мобилдик бригадалар үймө-үй кыдырып, беш күндүн аралыгында 2 500 адамдан пневмониянын белгилерин аныктады. Бул туурасында өкмөттүн облустагы өкүлчүлүгүнүн маалымат кызматы кабарлады.
Билдирмеге караганда, 25-июлдан тарта 173 медицина кызматкеринен турган 51 мобилдик топ айылдарды кыдырган.
"Медиктер 81 миңдей үйгө барып, 350 926 жаранды текшеришкен. Натыйжада 2 500 адамдан пневмония оорусу аныкталды. Мындан сырткары, учурда облустун аймагында 6 312 орундуу 169 стационар даярдалып, 438 медик тартылган. Облуста жалпы 1 100 дарыгер, 4 000ге жакын медайым, 1 800 кичи медкызматкер бар", — деп айтылат маалыматта.
Ош облусунун бийлиги 6 айга жетерлик дарынын запасы камдалганын айтты
Ошондой эле Ош облусу азыркы тапта 100дөн ашуун өпкөнү жасалма дем алдыруучу аппаратка муктаж экени белгиленет. Бүгүнкү күндө мындай аппараттан 99у гана иштеп жатат. Ал эми 777 кычкылтек концентратору бар. Анын 441и демөөрчүлөр тарабынан, 121и өкмөт, тогузу жергиликтүү бюджеттин эсебинен алынган.
