БИШКЕК, 27-июл. — Sputnik. Бишкекте стационарларга кайрылгандардын саны күн сайын кыскарып жатат. Бул тууралуу мэриядан билдиришти.
Маалыматка ылайык, акыркы суткада шаардагы 13 күндүзгү стационар 1 688 кишини кабыл алды.
"1 688 киши ооруканага жаткырылды. 27-июлга караган түнү түнкү стационарларга 357 киши кайрылган. 27-июлга карата күндүзгү стационарлар 72 миң 4 кишини кабыл алса, түнкү санитардык бөлүмгө 6 644 бейтап кайрылган", — деп айтылат маалыматта.
Мындай аз сандагы кайрылуулар шаарда стационарлар жаңыдан ачылып жатканда болгон. Ал кезде шаарда төрт стационар иштечү.
Бишкектеги ооруканаларда бейтаптар азаюуда. Бош орундардын тизмеси
Маалыматта өткөн суткада адам өлүмү катталбаганы белгиленди. Стационарлар Саламаттык сактоо министрлиги көрсөткөн дарылоо жолу менен иш алып барууда.
Бүгүнкү күндө стационарларда баш калаадагы үй-бүлөлүк дарыгерлер борборунун (ҮДБ) медиктери, чакырылган адистер, медайымдар, санитарлар, ординаторлор жана ыктыярчылар иш алып барууда.
Өткөн суткада коронавирустан 817 киши айыкты
Алар 14 күн иштеген соң эки жумага обочолонууга кетишет. Бүгүн нөөмөт алмашуу болуп, жаңы топ келип, ишке киришти. Медиктер коргонуучу каражаттар, ысык тамак, Garden мейманканасынан убактылуу жашоочу жай жана акысыз байланыш менен камсыздалган.
Карантиндик-казармалык режимге байланыштуу дарыгерлер күнүнө 2 миң 300 сом алышат. Орто медкызматкерлерге жана бул ишке тартылгандарга 2 миң сомдон чегерилет. Кичи медкызматкерлер болсо 1 800 сомдон алышат.
