БИШКЕК, 21-июл. — Sputnik. Өлкөнүн ар бир аймагында медициналык бет кап жана жеке коргонуучу каражаттарды чыгара турган цехтерди ачуу иштерин тездетүү шарт. Бул тууралуу Республикалык ыкчам штабдын отурумунда сөз болгонун өкмөттөн билдиришти.
"Аймактардагы жарандарды бет кап жана жеке коргонуучу каражаттар менен толук камсыз кылуу үчүн ар бир облуста цехтер ачылышы керек. Облус жетекчилери бул багыттагы иштерди күчөтүүгө тийиш. Чыгарылган продукция элге жеткиликтүү болуш үчүн баасы көзөмөлдөнсүн", — деди өкмөт башчы Кубатбек Боронов.
Муну менен катар ар бир аймакка компьютердик томография аппаратын алуу боюнча иштерди күчөтүү тапшырмасы берилди. Ага ылайык, өкмөттүн облустардагы ыйгарым укуктуу өкүлдөрү бул медициналык аппаратты жайгаштыруучу орундарды алдын ала даярдашы керектиги айтылды.
Ошондой эле жыйында дары-дармектердин тартыштыгын жоюу, шаарлар менен райондордогу коомдук жайларды, көчөлөрдү дезинфекциялоо чараларын күчөтүү боюнча сөз болду.
