БИШКЕК, 20-июл. — Sputnik. Эртең, 21-июлда, Россиядан Кыргызстанга коронавирус менен күрөшүүгө жардам берүү үчүн 100 медициналык кызматкер келет. Бул туурасында Россиянын Кыргызстандагы элчилигинен кабарлашты.
Россия бул жардамды президенттер Владимир Путин менен Сооронбай Жээнбековдун комплекстүү жардам көрсөтүү боюнча сүйлөшүүлөрүнөн кийин жөнөткөн.
Россия Кыргызстанга коронавируска даба болчу авифавир дарысын жиберет
"Алгач дарыгерлер түшкөн, дары жана медициналык жабдуулар салынган атайын учак келип конот. Алардын артынан эле Россиянын ӨКМинин 100гө чукул адистер жана коронавирус менен күрөшүүдө пайдаланыла турган дарылар жүктөлгөн учагы келет", — деп айтылган маалыматта.
Россиялык адистер Бишкек жана Оштогу ооруканаларда иштеп, кыргыз кесиптештерине жардам бермекчи.
Алардын коронавирус менен ооругандарды дарылоодо тажрыйбасы бар врач-эпидемиологдор, инфекционисттер экени айтылды.
"Медициналык жардам мурдагыдай эле бекер берилет. Бул Россия менен Кыргызстандын стратегиялык жактан өнөктөштүгүн жана союздаш экендигин бекемдейт", — деп жазылган билдирүүдө.
Буга чейин июлдун башында коронавируска каршы биргеликте күрөшүү үчүн Бишкекке Роспотребнадзордун делегациясы келген.
