БИШКЕК, 17-июл. — Sputnik. Россиянын премьер-министри Михаил Мишустин билдиргендей, Россия ЕАЭБге кирген өлкөлөр үчүн коронавируска каршы күрөшүү боюнча тажрыйбасы менен бөлүшүүгө даяр экенин айтты.
Минск шаарында өтүп жаткан Евразия экономикалык биримдигинин өкмөттөр аралык кеңешинин кезектеги (ЕӨАК) жыйыны өттү. Кыргызстандын атынан жыйынга премьер-министр Кубатбек Боронов катышты. Армения, Белоруссия, Казакстан, Кыргызстан жана Россия Федерациясынын өкмөт башчылары катышкан иш-чарада соода-сатык, өнөр жай, экономика, финансы саясаты жана агрардык өнөр жай комплекси тармактарында өз ара иштешүү маселелери талкууланды.
Россиянын премьер-министринин айтымында, жыйынга өкмөт башчыларынын катышуусу мамлекеттер кабылган коронавирус инфекциясынын мизи акырындан кайта баштаганынан кабар берет.
"Инфекциянын таралышына каршы күрөш уланууда жана ал биздин иш-аракеттерибиздин бирдиктүү болушун талап кылат. Россия пандемия менен күрөшүүдөгү тажрыйбасы менен бөлүшүүгө даяр. Биз өнөктөштөргө активдүү көмөктөшүп жатабыз жана "бештиктин" алкагында өз ара карым-катыш механизмдерин пландоодобуз", — деди Мишустин.
Ал белгилегендей, бул жерде медицина кызматкерлеринин кадырын көтөрүү, тест-системаларды, реагенттерди жана контактысыз термометрлерди берүү тууралуу сөз болууда. Мындан тышкары, ал россиялык окумуштуулар иштеп чыккан жана Россияда ийгиликтүү колдонула баштаган COVID инфекциясына каршы авифавир дарысы тууралуу да айтты.
