БИШКЕК, 17-июл. — Sputnik. Дем алыш күндөрү өлкө аймактарында аба ырайы өзгөрүлмөлүү болуп, айрым жерлеринде жамгыр жаашы ыктымал. Бул тууралуу Кыргызгидрометтен кабарлашты.
Ишемби күнү, 18-июлда, Чүй менен Таласта жаан-чачын күтүлбөйт. Бирок Чүй облусунун тоолуу райондорунда өткүн өтүп, күн күркүрөшү мүмкүн. Таласта күн ачык болот.
Ош, Баткен облустарынын тоолуу райондорунда өткүн өтүп, күн күркүрөшү ыктымал, дыйканчылык аймактарында жана Жалал-Абадда күн ачык болот.
COVID таасири: метеорологдор беш жылда климат кандай өзгөрөрүн айтышты
Ысык-Көлдүн көпчүлүк аймактарында өткүн өтөт. Кээ бир райондорунда жаан-чачын катуу болушу ыктымал.
Нарында өткүн өтөрү айтылды. Түштүк-батыштан соккон шамалдын ылдамдыгы секундасына 4-9 метрден кээ бир райондордо 15-20 метрге жетиши мүмкүн.
Ал эми 19-июлда Нарын менен Ысык-Көлдөн башка аймактарда күн ачык болот. Эки аймакта жамгыр жаашы күтүлүүдө.
Бишкек шаарында дем алышта күн ачык болору айтылды.
