БИШКЕК, 2-июл. — Sputnik. Жалал-Абад шаарындагы ыкчам штаб аймакта коронавируска каршы күрөшүү жана анын кесепеттерин жоюу боюнча олуттуу чектөөлөрдү киргизүү чечимин кабыл алды. Бул тууралуу Жалал-Абад шаарынын мэриясы кабарлады.
Чечимге ылайык, шаардагы кафе, ресторан жана коомдук тамактануучу жайларга саат 08:00дөн 20:00гө чейин гана иштөөгө уруксат берилет. Чайканалар ачык асман алдында иштөөгө тийиш. Тойканаларда той-аш, эскерүү иш-чараларын өткөрүүгө уруксат жок.
"Ишемби, жекшемби күндөрү коомдук транспорттор каттабайт. Базарлардын иштөө мөөнөтү таңкы саат 06:00дөн 18:00гө чейин деп чектелди. Кийим-кече саткан ири базарлар ишемби, жекшемби күндөрү жабылып, дезинфекциялоо жүргүзүлөт", — деп айтылат маалыматта.
Парктардагы аттракциондор, футбол аянтчалары, интернет клубдар, түнкү көңүл ачуучу жайлар жана бассейндердин ишмердүүлүгү белгисиз мөөнөткө токтотулуп, мечиттерде жамаат менен намаз окууга убактылуу тыюу салынды.
Тойкана, түнкү клубдар жабылат. Баш ийбесе жарыгы, суусу өчүрүлмөй болду
"Элдин массалык чогулуусуна жол бербөө максатында мечиттерде жума намазын окуу 4-июлдан тартып 18-июлга чейин убактылуу токтотулду", — деп белгиленет мэриянын билдирүүсүндө.
Бул чечимдердин аткарылышын көзөмөлдөө үчүн үзгүлтүксүз рейддер өткөрүлүп, мыйзам чегинде чаралар көрүлмөкчү.
Эскерте кетсек, кечээ Бишкек мэриясы бир катар карантиндик чектөөлөрдү киргизүүнү чечкен. Режимди бузгандардын электр жарыгы, сууну өчүрүрүлөрү эскертилген.
