БИШКЕК, 21-июн. — Sputnik. Ысык-Көл облусунан чыгууга жана ал жакка Бишкек тараптан кирүүгө тыюу салынды деп тарап жаткан маалымат чындыкка дал келбейт. Бул тууралуу облустук ыкчам штабдын маалымат катчысы Жаныбек Кожоев Sputnik Кыргызстан маалымат агенттигине билдирди.
Облустук штабдын маалымат катчысы Жаныбек Кожоев кечээ, 20-июнда, жыйын өткөнүн, бирок жогорудагы билдирүү тууралуу эч кандай кеп болбогонун билдирди.
"Бул фейк маалымат. Андай чечим кабыл алынган эмес. Мындай кадамдарга Республикалык штабдын айтуусу менен гана барабыз. Кыймыл мурдагыдай эле, чектөөлөр жок. 1-июндагы тартип боюнча кирип-чыккандардын дене табы өлчөнүп жатат. Эс алуу жайларына бара жаткан адамдар үчүн каттоо журналын ачышкан. Ал жакта жарандардын аты-жөнү, келген-кеткен убактысы, телефон номерлери жана паспортундагы маалыматтар жазылат. Бул кырдаал жаралса текшерүүгө оңой дегенди түшүндүрөт", — деди Кожоев.
Эске сала кетсек, буга чейин Кубатбек Боронов Бишкекте эпидемиологиялык абал күчөп бара жатканына байланыштуу дем алыш күндөрү — ишемби түштөн кийин жана жекшемби күнү толугу менен коомдук транспорттун кыймылын токтотуп туруу пландалып жатканын айткан. Ошондой эле региондор аралык коомдук транспорттор дагы токтотуларын билдирген. Бирок таски кызматы жана менчик, жүк ташуучу автоунаалар каттай бермекчи.
