БИШКЕК, 19-июн. — Sputnik. Президент Сооронбай Жээнбеков эпидемиологиялык кырдаалдын курчушуна жол бербей, абалды андан ары турукташтырып алып кетүүдө жергиликтүү бийликтин жоопкерчилиги чоң экендигин белгиледи. Бул туурасында мамлекет башчынын маалымат кызматынан кабарлашты.
Жээнбеков бул жоопкерчилик жөнүндө өлкөнүн айрым шаарлары менен райондорунда өзгөчө кырдаал режими алынып, комендатуралардын иши токтогондо эле эскерткенин белгилеген.
Ошондой эле коомдук транспорт илдетти жугузуп алууда кооптуу жай болуп жатканына көңүл бурган.
"Талаптарды аткарбай жаткан коомдук транспорт компанияларына карата тийиштүү чаралар көрүлүшү керек. Ресторан жана кафелер дагы коюлган талаптарды так аткарууга милдеттүү. Айрымдар өздөрү оорубай, бирок вирусту алып жүрүүчү катары коомго коркунуч жаратууда. Ошондуктан коомдук жайларда бет кап режимин сактоо маанилүү бойдон калууда", — деген Жээнбеков.
Мындан тышкары илдетти жугузуп алуу тобокелдиги жогору болгон кары-картаңдарга кам көрүү зарылдыгын белгилеп, чет мамлекеттен келип обсервацияга алынгандар катуу көзөмөлдө болушу керектигин билдирген.
Президент Республикалык штабга, Саламаттыкты сактоо министрлигине, облус жетекчилерине, район акимдерине жана мэрлерге илдет менен күрөшүү темпин мурдагыдан да күчөтүү талабын койгон.
