БИШКЕК, 12-июн. — Sputnik. Борбор калаадагы "Кайнар" рестораны бүгүнкүсү менен үчүнчү ирет массалык иш-чара өткөрүп жатканда "колго" түшүп, айып пул салынып, убактылуу жабылды. Бул туурасында мэриянын маалымат кызматынан кабарлашты.
Ал жерге Октябрь районунун акими Максим Ситников, шаардык санитардык-эпидемиологиялык борборунун башкы дарыгери Кубан Кундашев Санитардык экологиялык инспекция жана райондук милиция менен барганда дагы куран окутулуп жаткан.
"Банкет өткөрүүчү залда көп адамдар отуруп, куран окутуу болуп жатыптыр. Албетте, бардык санитардык нормалар бузулган экен. Санитардык патруль протокол түздү. Айып пулдан сырткары ресторан тиешелүү органдын өзгөчө көрсөтмөсүнө чейин жана эпидемиологиялык абал оңолгуча жабылды", — деп айтылат маалыматта.
Эске салсак, 11-июнда чектөө киргизилгенине карабастан Бишкектеги ресторанда куран окутуу болгон. Айрым ЖМКлар ал жерге Жогорку Кеңештин депутаттары жана аткаминерлер барганын жазып чыгышкан. Мындан улам ресторан администрациясы 3 000 сомдук айыпка жыгылган.
Ал эми вице-премьер Кубатбек Боронов аталган окуя аша чапкандык экендигин айткан.
