БИШКЕК, 5-июн. — Sputnik. Шаардын чок ортосунда жарандык никедеги аялын өрттөп жиберген эркек киши 7,5 жылга эркинен ажыратылды. Бул тууралуу маалымат Жогорку соттун расмий сайтында жарыяланды.
Укук коргоо кызматкерлери аны бат эле колго түшүрүп, Жазык кодексинин 39-130 беренесинин ("Бейбаштык максатта киши өлтүрүүгө аракет көрүү") негизинде сотко чейинки өндүрүш ачылып, шектүү эки айга камакка алынган.
Ал эми 33 жаштагы жабырлануучу Ысык-Көл облустук бириккен ооруканасынын травматология бөлүмүнө жаткырылган. Келиндин колу-буту, бети күйүп, оор жаракат алганы айтылат.
Айыпталуучу өз көрсөтмөсүндө мындай кадамга аялынын ызаланткан сөздөрү себеп болгонун билдирген.
"Ал күнү чөнтөгүмдө 500 сом бар болчу, бир литрдей арак ичкем. Базарда жүрүп аялымдын иштеген жерине барып "мени менен жашайсыңбы" деп сурагам. "Жок" дегенинен кетип калгам. Жакын жерде эле жүрсөм колуктум курбусу менен келип мени тээп, бетке чапкылап жиберген. Аялым мага кол көтөргөн эмес, бирок жаман сөздөрдү айтып тилдеген. Ызаланып бензин сатып келип, келинчегимди сыртынан камап, өрт коюп качып кеткем", — деген шектүү.
Фемида өкүлдөрү тараптарды угуп, чогулган материалды карап чыгып, эркек кишини жети жыл алты айга эркинен ажыратты.
