БИШКЕК, 27-май — Sputnik. Нарында коронавируска каршы санитардык эрежелерди сактабаган соода, тейлөө кызматтарынын жетекчилери айып пул төлөштү. Бул тууралуу өкмөттүн Нарын облусундагы өкүлү Эмилбек Алымкулов брифинг учурунда билдирди.
Анын айтымында, облуста соода, тейлөө кызматтарынын, базар, автобекеттердин иши жандангандан кийин санитардык эрежелердин аткарылышын текшерген атайын рейд жүргөн.
"Нарында коронавирус илдети жайылып жаткандыктан, менчигинин түрүнө карабай бардык мекемелер текшерилген. Ага чейин соода борбору, соода жайы, чач-тарач, тейлөө кызматтарына санитардык, коопсуздук эрежелери так айтылган. Бирок рейддин жүрүшүндө 62 объект каралып, андан эреже сактабаган соода, тейлөө жайларынын 15 жетекчисине 1000 сомдон айып салынды", — деди Алымкулов.
Коронавирус көп катталган аймактардын арасынан Нарын үчүнчү орунда турат. Бул аймакта вирус жуктургандардын саны 297ге жетти.
Кыргызстандагы COVID-19
Кыргызстанда коронавирус жуктургандардын жалпы саны 1520га жетти. 1043 бейтап айыгып, он алты киши каза тапты.
Өлкөдөгү абал тууралуу Sputnik Кыргызстан тексттик баяндама жүргүзүүдө.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
