БИШКЕК, 27-май — Sputnik. Нарын облусунун жетекчилигине сөгүш жарыяланып, облустук медициналык мекемелердин башчыларын иштен алуу сунушу киргизилди. Бул туурасында өкмөттүн маалымат кызматы кабарлады.
Өкмөттүн Нарын облусундагы өкүлү Эмилбек Алымкуловго, анын биринчи орун басары Касен Асизовго сөгүш берилди. Коронавирус инфекциясына каршы күрөшүү боюнча ишти жетишсиз деңгээлде жүргүзгөндүгү үчүн Республикалык ыкчам штабдын сунушу менен тийиштүү чечимди премьер-министр Мухаммедкалый Абылгазиев кабыл алган.
Буга кошумча, Республикалык штаб Саламаттык сактоо министрлигине Нарын облустук ооруканасынын директору Айбек Койчумановдун, анын орун басары Анара Калманбетованын, ошондой эле облустук Үй-бүлөлүк медицина борборунун директору, Саламаттык сактоо министрлигинин Нарын облусундагы координатору Муратбек Алияскаровдун ээлеген кызмат ордуларына ылайык келүү маселесин карап чыгуу сунушун берди.
"Нарын облусундагы эпидемиологиялык абал боюнча статистика дурус эмес, жалпысынан 297 учур аныкталса, анын ичинде 17си жаңы катталды. Нарын облусунда коронавирус инфекциясына кабылгандардын саны Ош жана Жалал-Абад облусуна салыштырмалуу жогору. Эгерде облустун жетекчилиги тийиштүү бүтүмдөрдү чыгарбаса жана абалды жакшыртпаса, анда тиешелүү чечим кабыл алынат", — деп айтылат маалыматта.
Билдирүүдө жаңы көз жарган аялдар ооруканадан чыгып кетүүгө аракет кылган учурларга жол берилгени белгиленди.
"Эпидемиологиялык абалды оңдоо үчүн облустун бардык мүмкүнчүлүгү бар болчу. Облустук төрөт үйүндө кырдаалды жакшырткан жоксуңар. Жаңы көз жарган аялдар ооруканадан чыгып кетүүгө аракет кылган учурларга жол берилди. Облус жетекчилиги толук киришпей, абалга тийиштүү көңүл бурбай койгон, ошондуктан бүгүнкүдөй статистиканы көрүп турабыз. Мунун бардыгы жетишсиз иштин, зарыл болгон ыкчам чечимдерди өз убагында кабыл албоонун, жагдайга карата талаптагыдай көзөмөлдүн жоктугунан болуп жатат. Буга жол бербеш керек!" — деди биринчи вице-премьер Кубатбек Боронов Республикалык штабдын жыйынында.
Өкмөттүн Нарын облусундагы өкүлү аймакта коронавирустун жайылышын алдын алууда кемчиликтер кеткенин, айрым, анын ичинде кадрдык жана башкаруучулук маселелерди чечүүдөгү иштин жетишсиздигин мойнуна алган.
Учурда Кыргызстан боюнча Нарын аймагында коронавирус кооптуулугу курч болуп турат. Өткөн суткада Нарын облусунан 17 кишиден инфекция чыккан.
