БИШКЕК, 20-май — Sputnik. Россиядан келип коронавирус аныкталган мигранттар Бишкек шаарында дарыланып жатат. Бул тууралуу Саламаттык сактоо министрлигинин маалымат кызматы кабарлады.
Билдирүүгө ылайык, Россиянын Соль-Илецк районунан келген кыргызстандыктардын ичинен 104 адамдан коронавирус табылган. Анын 47си дарыланып чыгып, 57 бейтап азыркы тапта Бишкек шаарында дарыланып жатканы маалым болду. Мындан тышкары учурда борбор калаада Санкт-Петербургдан келген 14 мекендеш да ооруканада.
Эске сала кетсек, 18-майда Соль-Илецкиден алып келинип, "Манас" аэропортунун жанындагы Американын мурдагы "Ганси" авиабазасынын аймагында жайгашкан "Семетей" обсервациясында жаткандар жаңжал чыгарган. Республикалык штабдын алгоритмине ылайык, ал жактагы 432 адамдын 19у гана обсервацияда калып, калганы үй карантинине жиберилген.
