БИШКЕК, 20-май — Sputnik. Өкмөткө караштуу болгон Майыптыгы бар адамдардын маселелерин караган кеңеш түзүлүп, анын жобосу бекитилди. Тиешелүү чечимге премьер-министр Мухаммедкалый Абылгазиев кол койгонун өкмөттүн маалымат кызматы билдирди.
Майыптыгы бар адамдарды социалдык коргоого байланыштуу маселелерди кароодо бир нече мекемелер, тараптар өз ара иш алып барышы керек. Алар мамлекеттик жана жергиликтүү өз алдынча башкаруу органдары, коомдук бирикмелер, илимий жана башка уюмдар.
"Кеңеш өлкөдө майыптыгы бар адамдардын көйгөйлөрүн чечүүдө туруктуу иштеп, кеңеш бермекчи. Аларды колдоо жаатында натыйжалуу мамлекеттик саясат түзүп, реабилитациялоо жана алдын алуу чараларын иштеп чыгып, бул тармактагы мыйзамдарды аткарган орган болот", — деп айтылат маалыматта.
Эскерте кетсек, буга чейин 2011-жылы 21-ноябрда Нью-Йоркто БУУнун Башкы Ассамблеясынын 66-сессиясынын алкагында Кыргызстан майыптыгы бар адамдардын укуктары жөнүндө конвенцияга кошулган. Президент Сооронбай Жээнбеков 13-мартта БУУнун майыптардын укугу боюнча конвенциясын ратификациялаган.
