БИШКЕК, 17-май — Sputnik. Жаза аткаруу мамлекеттик кызматынын төрт кызматкеринен COVID-19 аныкталган. Бул тууралуу саламаттык сактоо министринин орун басары Нурболот Үсөнбаев брифингде билдирди.
Анын айтымында, бейтаптар жугуштуу оорулар бөлүмүнө жаткырылган.
"Төртөө менен байланышта болгондордун баарын табуу иштери жүргүзүлүп жатат. ЖАМКтагы абал адистердин көзөмөлүнө алынды", — деди Үсөнбаев.
Эскерте кетсек, буга чейин жалпы күч органдарында иштеген 65 кызматкердин коронавирус жуктуруп, ооруканада дарыланып жатканы айтылган.
Коронавирустун кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
