БИШКЕК, 16-май — Sputnik. Президент Сооронбай Жээнбеков бүгүн, 16-майда, Энелер күнүн утурлай, өлкөнүн көп балалуу энелери менен жолугушуп, аларга Баатыр эне орденин тапшырды. Бул тууралуу өлкө башчынын маалымат кызматы билдирди.
Жолугушууга Чүй облусунун Сокулук районунун тургуну Альфия Закирова, Чүй облусунун Аламүдүн районунун тургуну Дилбар Пардабаева, Чүй облусунун Токмок шаарынын тургуну Юлия Алексеева, Талас облусунун Бакай-Ата районунун тургуну Динара Султанмуратова, Бишкек шаарынын тургуну Маматали кызы Гүлбарчын катышты.
Мындан тышкары президенттин жарлыгына ылайык, өлкөдөгү 1014 энеге Баатыр эне наамы, ал эми 519 энеге Эне даңкы наамдары ыйгарылды.
Президент көп балалуу энелерге кубаныч, жарык маанай, балдарынын ийгиликтери менен жетишкендиктерин, ошондой эле бекем ден соолук, бакубатчылык жана бактылуу жашоону каалады.
Эске салсак, Кыргызстанда жыл сайын май айынын үчүнчү жекшембисинде Энелер күнү белгиленет.
