БИШКЕК, 14-май — Sputnik. Парламентаризмди өнүктүрүү үчүн шайлоо босогосун 11 пайызга чейин көтөрүш керек. Бул туурасында Жогорку Кеңештин депутаты Төрөбай Зулпукаров шайлоо босогосун 7 пайызга түшүрүү боюнча мыйзам долбоору талкууланып жатканда билдирди.
Эл өкүлү шайлоо жакындаганда депутаттар өзү каалагандай же жага турган мыйзамдарды кабыл ала бербеши керектигин белгиледи.
"Бул жерде 5 же 7 пайыз жөнүндө талкуу болуп жатат. Муну саясат кылып эмне кылабыз. Азыр мыйзамдын концепциясы каралып жатат, эгер бир депутат 5 пайыз кылып өзгөртүүгө сунуш берсе, эске алынат. Эгер менин оюмду билгиңер келе турган болсо айтайын, 5 дагы, 7 пайыз дагы туура эмес. Эгер келечекте парламентаризмди өнүктүрөбүз дей турган болсок, 9 эмес, 11 пайыз кылыш керек", — деди Зулпукаров.
Бүгүн Талант Мамытов, Өмүрбек Бакиров, Азиз Турсунбаев, Кубанычбек Нурматов башында турган 21 депутат шайлоо босогосун 7 пайызга түшүрүү боюнча мыйзам долбоорун палатага алып чыкты. Ал бир топ талаш-тартыш менен коштолду.
Эскерте кетсек, 2010-жылы шайлоо босогосу 5 пайызды, 2015-жылы 7 пайызды түзгөн. Андан соң 2017-жылда киргизилген өзгөртүүлөргө ылайык, 9 пайыздык чек коюу үстүбүздөгү жылдын январынан тартып күчүнө кирген.
