БИШКЕК, 4-май — Sputnik. Чүй облустук Жол кыймылы коопсуздугун камсыздоо башкармалыгынын маалымат кызматы Москва районунун Александровка айылында болгон жол кырсыктын чоо-жайын айтты.
Билдирмеге караганда, окуя бүгүн, 4-майда, саат 12.00 чамасында болгон.
“Бишкек — Ош жолунда ГАЗ-53 автоунаасын 24 жаштагы айдоочу чыгыштан батышты көздөй айдап бара жаткан. Алдын ала маалыматтар боюнча, ал каршы тилкеге чыгып Daewoo Nubira үлгүсүндөгү машина менен кагышкан”, — деп айтылат маалыматта.
Кырсыктан кийин жеңил автоунаанын 33 жаштагы айдоочусу жана үч жүргүнчү Москва райондук ооруканасына жеткирилген.
Жеринде ыкчам тергөө тобу иштеп жатат, бардык материалдар Москва РИИБдин тергөө кызматына өткөрүп берилди.
Буга чейин социалдык тармакка ушул кырсыктан кийин тартылган видео жарыяланган. Кадрдан жеңил машина жалпайып, такыр жараксыз болуп калганын, жүк ташуучу автоунаа капталынан жатканын көрүүгө болот.
