Жаманкулов: музейлер онлайн экскурсия жүргүзүүдө
Музейлер онлайн акцияларды өткөрүп жатышат. Мисалы, кичинекей балдар үчүн социалдык тармактарга белгилүү бир сүрөтчүнүн портретин жайгаштырып, аны тартуу боюнча тапшырма берилет. Жакшы чагылдырылган сүрөттөр карантин бүткөн соң уюштурулган көргөзмөгө коюлат. Бул тууралуу Азамат Жаманкулов Sputnik Кыргызстан радиосуна маек куруп жатып билдирди.
Анын айтымында, бир-эки каарман ойногон моноспектаклдерди жаратуу иштери колго алынып, учурда драматургдар сценарийлерин жазып бүтүп калышты.
"Коронавирус пандемиясына байланыштуу музейлер түрдүү акцияларды уюштуруп жатса, китепканалар онлайн китеп окуу, угуу, жүктөп алуу системаларын иштетип жатышат. Ал эми театр өкүлдөрү социалдык тармак аркылуу үйлөрүндө отуруп алып мастер-класстарды өткөрүшүүдө. Ошону менен бирге эле учурда бир-эки каармандын катышуусундагы моноспектаклдерди жаратуу пландалууда. Буга чейин көлөмдүү жазылган моноспектаклдер жок болгондугуна байланыштуу, драматургдар чыгарма жаратуунун үстүндө иштеп жатышат. Мындан сырткары ырчылар техникалык ресурстарынын жетишине жараша акысыз концерттерди уюштуруп, онлайн же аралыктан калкка тартуулашууда. Муну менен катар эле музейлер жаш балдар үчүн, чоңдор үчүн түрдүү акцияларды өткөрүү менен аудио, видео тартып, телеканалдарга беришүүдө", — деди Жаманкулов.
Министр алтын казынада сакталган спектаклдер телеканалдарга берилип жана театр сүйүүчүлөрү үчүн аталган мекеменин социалдык тармактагы расмий баракчаларында да көрсөтүлүп жаткандыгын кошумчалады.
