БИШКЕК, 23-апр. — Sputnik. Чыгыш Казакстан облусундагы “Семей Орманы” коругунун аймагында өрт чыкты. Бул тууралуу Sputnik Казакстан жазды.
Маалыматка караганда, жалынды өчүрүүгө тик учактар дагы тартылды. Өрт 23-апрель күнү саат 15:00дө башталган.
“Токой күйүп жатат. Өрт Иртыш жээктеринен мамлекеттик токой фондунун аймагына жармашты. Анын аянты 100 гектарга чамалайт”, — деп айтылат маалыматта.
Саат 15:35те Усть-Каменогорскиден МИ-8 (суу чачкычы бар) үлгүсүндөгү учак чакыртылган. Ошондой эле 26 өрт өчүрүүчү унаа, токой өртүнө ылайыкташкан төрт атайын комплекс, үч трактор, эки кайгуул унаасы, МИ-2 үлгүсүндөгү бир тик учак жана 75 адам тартылды.
Шамалдын ылдамдыгы секундасына 16 метрге жетип жатат.
