БИШКЕК, 20-апр. — Sputnik. 21-апрелде Чүй, Талас, Ысык-Көл жана Нарын облустарынын тоолуу райондорунда кар жаашы күтүлөт. Ал эми дыйканчылык аймактарында күн ачык болот. Бул тууралуу Кыргызгидромет маалымдады.
Ошондой эле Ош, Жалал-Абад жана Баткен жергелеринин тоолуу өрөөндөрүндө өткүн өтүп, чагылган түшүшү ыктымал. Бийик тоолуу райондорунда кар жаайт. Калган аймактарда жаан-чачын күтүлбөйт.
Бийик тоолуу өрөөндөрдө жолдор тайгак болот. Шамалдын багыты өзгөрүлүп, ылдамдыгы секундасына 1-6 метрге, ал эми Ысык-Көл акваториясында 4-9 метрге чейин жетет.
Абанын температурасы Чүй менен Талас жергелеринде +21…+26, Ош, Баткен жана Жалал-Абад облустарында +22…+27, Ысык-Көл менен Нарында +16…+21 градус жылуу болору айтылды.
Ал эми Бишкек жана Ош шаарларында жаан-чачын күтүлбөйт. Күндүн табы ордо калаада +24…+26 градуска чейин көтөрүлсө, Ошто +25…+27 градуска дейре жылыйт.
