Ниязов: Мыскал эже кайгысынын баарын үшкүрүп чыгарып алчу
Мыскал эже сөз сүйлөп эле артынан үшкүрүнүп турчу. Биз анда жаш болуп көңүл бурбаптырбыз. Көрсө, эженин башынан көп кыйынчылыктар өткөн экен. Бул тууралуу Келдибек Ниязов Sputnik Кыргызстан радиосуна маек куруп жатып билдирди.
Анын айтымында, Мыскал Өмүрканованын көзү өткөндө "Ала-Арча" көрүстөнүнө коюуга каршы чыккандар болгон.
"Азыркы "Тунгуч" театры жайгашкан жерде концерттик даярдыктар өтөр эле. 1972-жыл, мен эстрадада иштеп калган кезим. Бизге чейин даярданууга оркестр келет, андан соң биз эки саат, бизден кийин бийчилер келип машыгышат. Ушинтип иштеп жүргөн күндөрүмдө Чоро Кожомжаровго ийинине баштык илип алган бир кара кемпир келип жүрдү. "Чоро, комузду унутпа, даңкылдакка кызыгып жүрүп күү черткенди таштап салба, айланайын", - деп көп айтчу ошол кемпир. Көрсө, ал Мыскал Өмүрканова экен. Эже ар бир сөзүндө "айланайын", "кагылайын" деп турчу. Анан сөз сүйлөп бүтүп эле терең-терең үшкүрүп алчу. Биз жаш болуп этибар албаптырбыз. Мыскал эже жеке жашоосунда көп кыйынчылыктарды башынан өткөрүп, ишине гана алаксып турган учурунда эрте эле пенсияга чыгарып коюшкан экен. Ошентсе да эч кимге арызданбай өз оокатын кылып жүргөн тура. Кийин көзү өткөн соң сөөгүн "Ала-Арча" көрүстөнүнө коюуга каршы чыккандар болуп, Байтикке коюлган. Керек болсо эч кандай белги тургузулган эмес экен, кийин Мыскал Өмүрканованын мүрзөсүн таппай издегендер болду", — деди Ниязов.
Ал Мыскал Өмүрканованы талантынан сырткары эч бир адам тууралуу оозунан таарыныч, жаман сөз чыгарбаган аял киши катары эстеп калганын кошумчалады.
