БИШКЕК, 3-апр. — Sputnik. Кыргызстан менен Тажикстандын автоунаа жолдорунун кесилишине жол чырактар жана байкоо камералары орнотулду. Бул тууралуу өкмөттүн Баткен облусундагы ыйгарым укуктуу өкүлүнүн маалымат кызматы билдирди.
Ага ылайык, кечээ, 2-апрелде, Баткен районунун Жака-Өрүк тилкесинен өткөн Баткен — Исфана унаа жолу менен Тажикстандын Исфара — Ворух жолунун кесилишине төрт жол чырак орнотулуп бүттү.
Белгилей кетсек, ушул жылдын 14-январында кыргыз-тажик чек арасында "Кызыл-Бел " жана "Гүлистон" көзөмөл-өткөрмө жайларынын аймагында Кыргызстан менен Тажикстандын чек арасын делимитациялоо жана демаркациялоо боюнча өкмөттүк комиссиянын жолугушуусу өткөн.
Анда тараптар чек ара аймактарындагы элдин коопсуздугун камсыз кылуу, айрым чыр-чатактарга так жана туура анализ жүргүзүү максатында эки өлкөнүн чектеш аймактарына жол чырактарды жана байкоо камераларын орнотууну макулдашып, протоколго кол коюшкан. Бул ишти Баткен менен Согди облустарынын башчылары Алишер Абдрахманов менен Раджоббой Ахмадзода аткармай болгон.
