БИШКЕК, 2-апр. — Sputnik. Президент Сооронбай Жээнбеков коронавирус инфекциясынын кесепеттерин азайтуу максатында Европа кеңешине Кыргызстанга жардам көрсөтүү мүмкүнчүлүгүн карап көрүүнү сунуштады. Бул тууралуу өлкө башчынын маалымат кызматынан билдиришти.
2 Чын Куран 2020, 13:47
Маалыматка ылайык, бүгүн, 2-апрелде, Жээнбеков Европа кеңешинин президенти Шарль Мишель менен телефон аркылуу сүйлөшкөн. Анын жүрүшүндө эки тараптуу кызматташуунун актуалдуу маселелери жана коронавирус инфекциясына каршы күрөшүү чаралары талкууланган.
Мамлекет башчысы Европа биримдигиндеги өлкөлөрдө коронавирус инфекциясынын жайылышына байланыштуу колдоо сөздөрүн айтып, дүйнөдөгү эпидемиологиялык кырдаалдын тез арада оңолуп кетишине үмүт артаарын билдирген.
Ошондой эле коронавирус инфекциясынын жайылышын алдын алуу боюнча Кыргызстанда көрүлүп жаткан чаралар тууралуу айтып берген.
"Президент Сооронбай Жээнбеков Европа кеңешине коронавирус инфекциясынын кесепеттерин азайтуу максатында Кыргызстанга кошумча жардам көрсөтүү мүмкүнчүлүгүн карап көрүүнү сунуштады. Ал эми аталган кеңештин төрагасы өлкөгө финансылык жардам көрсөтүүнүн оптималдуу жолдорун карап чыгарын убадалады", — деп айтылат маалыматта.
Буга чейин Эл аралык валюта фонду Кыргызстанга коронавирус менен күрөшүү үчүн 121 миллион долларга чукул каражат бөлгөн.
