Мыкты видеосабак үчүн мугалимдерге сынак жарыяланды. Жеңүүчүгө — 50 миң сом

БИШКЕК, 28-мар. — Sputnik. Билим берүү жана илим министрлиги мугалимдер арасында эң мыкты видеосабак үчүн республикалык сынак жарыялады. Бул тууралуу аталган мекеменин маалымат кызматы билдирди.

Ага ылайык, сынак үч этапта өтөт. Биринчи этап 26-марттан 2-апрелге чейин, экинчи этап 2-апрелден 30-апрелге чейин, ал эми үчүнчү этап 30-апрелден 18-майга чейин болмокчу.

Шарттары:

• Сынакка бардык мугалимдер катыша алат;
• Видеосабактар кыргыз жана орус тилинде болушу керек;
• Ар бир катышуучу окуу программасына туура келген сабактарды өтүшү шарт;
• Ар бир сабактын убактысы 25 мүнөттөн ашпоосу зарыл;
• Ар бир катышуучу бештен кем эмес видеосабак жөнөтүшү шарт.

"Ага базалык окуу планына, предметтик стандартка, окуу программасына, календардык-тематикалык планга дал келген жана IV чейректе өтүлө турган сабактардын материалдары менен гана катышууга болот. Видеоматериалдар сынак жарыяланган күндөн баштап даярдалышы керек жана билим берүү порталдарында, You Tube, Facebook сыяктуу интернет булактарына жайгаштырылышы зарыл", — деп айтылат маалыматта.

Видеосабактары мыкты аталгандар үчүн демөөрчүлөр тарабынан акчалай сыйлыктар каралган. Алсак, 1-орунга 50 000 сом, 2-орунга 40 000 сом, 3-орунга 30 000 сом. Мындан сырткары, катышкандыгы үчүн 10 000 сомдон жана башка кызыктыруучу белектер берилери айтылды.