БИШКЕК, 28-мар. — Sputnik. Түрк лидери Режеп Тайип Эрдоган коронавирус пандемиясына байланыштуу өлкө чет мамлекеттер менен авиакаттамдарын токтотконун билдирди. Бул туурасында РИА Новости жазды.
Түркиянын саламаттык сактоо министри Фахреттин Коджанын билдиришинче, жума күндөгү маалымат боюнча өлкөдө бир суткада вирус жуктургандар 2000ден ашып, бейтаптардын жалпы саны 5698ге жетти. Ал эми коронавирустан 92 киши көз жумган.
"Бүгүн биз элдин саламаттыгы үчүн жаңы чараны кабыл алдык. Эл аралык авиакаттамдар толугу менен токтотулат. Шаар аралык каттоолор боюнча губернаторлордон уруксат алуу керек. Бул биринчи кезекте 30 ири шаарга тиешелүү. Компанияларда азыраак кызматкерлер иштеп турат. Биз үйдө обочолонуп отурууну улантышыбыз керек", — деген Эрдоган элге кайрылуусунда.
Ал учурда өлкөдө 42 адам вирусту жеңип, 344 киши жандандыруу бөлүмүндө экендигин кошумчалаган.
"Көп нерсеге тынчсыздануунун кажети жок. Бизде азык-түлүк, дары-дармек, тесттер, кол каптар, маскалар жетиштүү. Буларды өлкө өзү чыгарат эмеспи. Ошондой эле Түркияда жетиштүү санда жандандыруу бөлүмдөрү бар", — деген түрк лидери.
Ушу тапта Түркияда массалык иш-чаралар токтотулуп, эл көп барган бир катар жайлар жабылган. Мындан сырткары, 65 жаштан өткөндөргө үйдөн чыгууга тыюу салынган.
Коронавирус тууралуу
Жер жүзү боюнча ага кабылгандардын саны 597 072 болду. Өмүрү менен кош айтышкандар — 27 360, айыккандар — 131 698ге чамалап барды.
