БИШКЕК, 28-мар. — Sputnik. 28-мартка караган түнү Жалал-Абад облусунун Ала-Бука районунда 17-мартта чет өлкөдөн келген 82 жаштагы жаран көз жумду. Бирок мунун коронавируска тиешеси жок экенин брифинг учурунда Саламаттык сактоо министрлигинин штаб жетекчисинин орун басары Касымбек Мамбетов билдирди.
“Ала-Букада аял киши коронавирустан көз жумган деген маалымат тараган. Ал адам чет мамлекеттен келип, 17-мартта обсервацияга жаткырылган. 20-мартта анализи коронавирус жок экенин көрсөткөн. Диагнозу пневмония, кардиосклероз жана кан басымы жогорулап кеткен. Дарыгерлер анын өмүрүн сактап калууга аракет кылышты, бирок түндө көзү өтүп кетти”, — деди Мамбетов.
Мамбетов бул өлүмдүн коронавирус менен эч кандай байланышы жок экенин кошумчалады.
Коронавирус Кыргызстанда
27-мартта Кыргызстанда коронавирус жуктуруп алган адамдардын саны 58ге жеткен. Жаңы учур Сузак (7), Өзгөн (3), Кара-Суу (1), Ноокат (1) райондорунда жана Ош шаарында (1) катталган. Вирус жуктуруп алгандардын ону аял, төртөө эркек киши.
Бишкек, Ош, Жалал-Абад шаарлары жана Ноокат, Кара-Суу, Сузак райондоруна 15-апрелге чейин өзгөчө абал киргизилген.
Учурда өлкө аймагындагы кырдаал тууралуу Sputnik Кыргызстандын тексттик баяндамасынан кабардар болуп туруңуз.
