БИШКЕК, 27-мар. — Sputnik. Өлкө башчы Сооронбай Жээнбеков Дүйнөлүк банктын Кыргызстандагы кеңсесинин башчысы Болормаа Амгаабазар менен жолугушуп, өлкөдөгү экономикалык кырдаал боюнча сүйлөштү. Бул тууралуу президенттин маалымат кызматы кабарлады.
Билдирмеге ылайык, жолугушууда Жээнбеков коронавирус инфекциясынын дүйнөгө жайылышы Кыргызстандын экономикасына да терс таасирин тийгизгенин айтып, Дүйнөлүк банкка Кыргызстандагы долбоорлорду каржылоо маселесин карап чыгууну сунуштады.
Болормаа Амгаабазар бул багытта өлкөнүн тийиштүү мамлекеттик органдары менен активдүү иштер жүрүп жаткандыгын белгилеген. Ал башка долбоорлорго жумшалчу каражаттын бир бөлүгү саламаттык сактоо түзүмүн колдоо үчүн берилгени жатканын айтты.
Болормаа Амгаабазар Дүйнөлүк банк тарабынан коронавирус илдети менен күрөшүү үчүн өнүгүп келе жаткан өлкөлөргө жалпы бюджети 160 миллиард долларды түзгөн көмөк көрсөтүү фонду түзүлгөнүн билдирди. Ал жеке компанияларды колдоо ниети бар экендигин да айтты.
Эске салсак, Эл аралык валюта фонду Кыргызстанга коронавирус менен күрөшүү үчүн 121 миллион долларга чукул каражат бөлдү.
Коронавирус Кыргызстанда
Бүгүн Кыргызстанда коронавирус жуктуруп алган адамдардын саны 58ге жетти. Жаңы учур Сузак (7), Өзгөн (3), Кара-Суу (1), Ноокат (1) райондорунда жана Ош шаарында (1) катталды. Вирус жуктуруп алгандардын ону аял, төртөө эркек киши.
Бишкек, Ош, Жалал-Абад шаарлары жана Ноокат, Кара-Суу, Сузак райондоруна 15-апрелге чейин өзгөчө абал киргизилген.
Учурда өлкө аймагындагы кырдаал тууралуу Sputnik Кыргызстандын тексттик баяндамасынан кабардар болуп туруңуз.
