БИШКЕК, 26-мар. — Sputnik. Өкмөт аз камсыз болгон жарандар жана үй-бүлөлөрдү ун менен камсыз кылат. Бул тууралуу өкмөттүн маалымат кызматы кабарлады.
Билдирмеге ылайык, бул үчүн мамлекеттик материалдык резервдер фондунан он миң тонна ун чыгарылат.
"Өлкөнүн бардык аймактарындагы үй-бүлөлөргө ун жеткирүү иши Өзгөчө кырдаалдар, Эмгек жана социалдык өнүктүрүү министрликтерине, жергиликтүү өз алдынча башкаруу органдарына жүктөлдү. Өкмөт калктын аярлуу катмарын камкордуксуз калтырбайт жана бардык резервди мобилизациялайт", — деп айтылат билдирүүдө.
Премьер-министр Мухаммедкалый Абылгазиев өкмөттүн атынан медицина кызматкерлерине жана муктаждарга жардам берген ишкерлерге, ыктыярчы уюмдарга ыраазычылык билдирген.
Эске салсак, өлкөдө коронавируска кабылгандардын саны 44кө жетти.
