БИШКЕК, 25-мар. — Sputnik. Россия президенти Владимир Путин эмки аптаны эс алуу катары жарыялап, бирок айлык акылары сакталарын билдирди.
Президент COVID-19 вирусунун жайылышына байланыштуу өз элине кайрылды.
Анда Путин россиялыктарды бул күндөрү үйүнөн чыкпоого үндөдү. Вирус ар бир адамга жугуп калышы мүмкүн экенин эске салып, жоопкерчиликтүү болууга чакырды.
Мындан тышкары, ал насыя жана ипотекалык төлөмдөр кечиктирилген учурда айып пулсуз кабыл алуу жолдорун карап чыгууну сунуштады.
"Кирешеси 30 пайызга төмөндөп кеткен жарандардын керектөөчүлүк кредиттери жана ипотекасы болсо, жеңилдиктерди карап берүүгө чакырам”, — деди президент.
Мындан тышкары, ал Борбордук банкка коронавирустан жабыркаган ишкерлерге колдоо көрсөтүү боюнча механизмдерди иштеп чыгууну тапшырды.
