БИШКЕК, 23-мар. — Sputnik. Алдыдагы жергиликтүү жана айрым шаардык кеңештерге шайлоо күнү жылды. Бул тууралуу Жарлыкка бүгүн 23-мартта президент Сооронбай Жээнбеков кол койгонун өлкө башчынын маалымат кызматы кабарлады.
Белгилей кетсек, 12-апрель күнү Кыргызстанда жергиликтүү кеңештерге, ошондой эле Ош, Каракол, Балыкчы, Токмок жана Майлуу-Суу шаардык кеңештерге шайлоо болмок. Буга чейин БШК аны токтотууга жана жылдырууга укуктук негиз жок экенин айтып келген.
"Баш мыйзамда Кыргызстан үчүн демократиялык өлкө катары эң баалуу болуп адам эсептелет. Жарандардын укугу, ден соолугу биринчи орунда тургандыктан, эпидемиологиялык жагдайды эске алуу менен кээде шашылыш чечимдерди кабыл алууга туура келет. Жогорку Кеңештин депутаттарынын, шайлоо комиссияларынын сунуштарын эске алуу менен жарандардын коопсуздугу үчүн жергиликтүү кеңештерге шайлоо процесстери токтотулду", — деп айтылат билдирүүдө.
Президенттик аппарат шайлоо процесстерин ишке ашыруу боюнча маселеге өлкөдө өзгөчө кырдаал жоюлгандан кийин кайрылары айтылды.
Эске салсак, COVID-19 вирусунан улам Кыргызстанда 22-марттан баштап бир айлык мөөнөткө өзгөчө кырдаал жарыяланган.
