БИШКЕК, 17-мар. — Sputnik. Бүгүн түнкү саат 11ден таңкы бешке чейин Бишкек шаарын тик учак менен дезинфекция кылуу үчүн дары чачышат деген маалымат чындыкка дал келбейт. Бул туурасында Саламаттыкты сактоо министрлиги менен Куралдуу күчтөрдүн Башкы штабы билдирди.
Белгилей кетсек, маалымат мессенджерлерге тарап, анда саат 23:00дөн тарта 5:00гө чейин тик учак менен дезинфекция жүргүзүлгөндүктөн, терезе менен балкондор жабык болушу керектиги кабарланган. Мындай кабарды аскер бөлүгү таратканы жазылган. Бул боюнча "Бишкек сегодня" Telegram-тайпасындагы катталуучулар арасында талаш-тартыш жаралды.
Бирок Sputnik агенттиги Башкы штабга кайрылганда "маалымат жалган, эч кандай тик учак чыкпайт" деп билдиришти.
Саламаттыкты сактоо министрлиги да маалыматты төгүндөп, дезинфекциялык иштер учурда жерден гана жүргүзүлүп жатканын маалымдады.
Буга чейин ИИМ коронавирус жугузуп алды деп жалган кабар тараткан бир катар адамдарды суракка алган эле.
