БИШКЕК, 13-мар. — Sputnik. Алматы шаарында коронавирус аныкталган дагы бир учур катталды. Бул бүгүнкү күндүн эсебинен төртүнчү адам экенин Sputnik Казакстан маалымдады.
Буга чейин Казакстанда үч адамдан коронавирус аныкталган.
Ооруну жуктуруп алган эки адам Германиядан Алматыга учуп келгендер болсо, үчүнчүсү Италиянын Милан шаарынан 12-мартта Нур-Султанга келген аял болуп чыккан.
Казакстандын Саламаттык сактоо министрлигинин өкүлү Диас Ахматшариптин айтымында, коронавирус аныкталган төртүнчү адам 44 жаштагы эркек киши.
"Инфекцияны жуктуруп алган төртүнчү адам Германиядан келген. Ал дароо ооруканага жаткырылып, дарылана баштады", — деди Ахматшарип.
Анын айтымында, Миландан Москва аркылуу жубайлар да учуп келген. Аялынан коронавирус аныкталып, күйөөсүнөн табылган эмес.
