Март айында сасык тумоо, курч респиратордук вирустар күчөйт. Быйыл ага коронавирус кошулганы кооптондурууда. Бул тууралуу Сагынбек Уезбаев Sputnik Кыргызстан радиосунун "Ачык кеп" программасында маек куруп жатып билдирди.
Уезбаев: тазалыкты камсыздоо вирустун жайылышына бөгөт коёт
Анын айтымында, жыл сайын курч респиратордук вирустардан 50 миллиондой адам жабыркап, 650 миңге чейин адам дарт оорлошуп кетип каза табат.
"Жыл сайын күндүн жылышы менен курч респиратордук вирустар күч алат. Быйыл коронавирустун кошулуусу бир аз кооптондуруп жатат. Тилекке каршы, коронавирус 80ден ашуун өлкөдө катталды. Анткен менен дартка чалдыккандардын 80 пайызга чукулу дарыланып, сакайып үйлөрүнө коё берилди. Аталган оору кары-картаңдарда, өнөкөт оорусу бар адамдарда күчөп кетип жатыптыр. Вирус коңшу өлкөдөн тарап, күчөп жатса биз дагы ага даяр турушубуз керек. Илдет бөлмөнүн ичинде көпкө сүйлөшүп отурганда аба аркылуу жугат. Бөлмөдөгү эмеректерде, буюмдарда вирус бир нече саатка чейин калат. Аны кол менен сыйпалап, кайра мурун, көз, оозубузду кармалап, оору жуктуруп алуу коркунучу бар. Ошондуктан колду бат-баттан самындап, жышып жууп, антисептикалык каражаттарды колдонуу зарыл. Жөтөлгөндө, чүчкүргөндө кагаз майлык колдонуп же чыканагыңар менен тоскула. Ооруп калган адам же бейтап карагандар бет кап тагынуусу керек. Аны ар үч саат сайын алмаштыргыла. Бөлмөнү желдетип, ным чүпүрөк менен сүртүү абзел. Андан тышкары, эт азыктарын жакшылап бышырып, тамак даярдоо коопсуздугун сактаган туура", — деди Уезбаев.
Ошондой эле ал кучакташып, кол алышып учурашуу вирустун жайылышына шарт түзүшү ыктымалдыгын кошумчалады.
