Тамак-ашы, майы жок. Ирандагы кыргызстандык айдоочулар жардам суроодо. Видео

БИШКЕК, 6-мар. — Sputnik. Иранда жүргөн кыргызстандык айдоочулар Тышкы иштер министрлигине кайрылуу жолдошту.

Азыр 18 айдоочу Ирандын Азербайжан менен чектешкен Астара шаарында турат.

"Кыргызстандын ТИМине кайрылып жатабыз. Биз — кыргызстандык айдоочуларбыз. Министрликтин коронавирустан улам чыга албай жатканыбыздан кабардар экенин билебиз. Бизге жардам берүүңүздөрдү өтүнөбүз. Абалыбыз кыйын, же майыбыз жок, же ичүүгө тамак-ашыбыз жок. Министрликтен тезирээк сүйлөшүүлөрдү жүргүзүп, бизди чыгарып алуусун сурайбыз", — деп айтылат видеодо.

Мындан тышкары, мекендештер Ирандын Түркмөнстан менен чектешкен жеринде да кыргызстандык айдоочулардын бар экенин айтышты. Белгилей кетсек, Ирандын Азербайжан менен да, Түркмөнстан менен да чек арасы учурда жабык.

Акыркы маалымат боюнча, аталган мамлекетте коронавирус жуктуруп алгандардын саны 3 513 кишиге жетип, анын 107си каза тапты. 739 бейтап айыгып кеткен.

Тышкы иштер министрлиги кыргызстандыктарды өлкө аймагынан чыгаруу боюнча сүйлөшүүлөр жүрүп жатканын айтышты.

"2-4-март күндөрү ТИМге Азербайжан, Түркмөнстан жана Россия элчилери чакырылган. Биз кыргызстандык айдоочулар менен автоунааларды өткөрүү боюнча маселени оң жагына чечүүгө жардам берүүнү өтүндүк. Буга кошумча, Иранда туруп калган айдоочулар менен да сүйлөшүп жатабыз. Кайрылуудан кийин дароо эле биздин Тегеран, Баку жана Ашхабаддагы эчиликтер маселени өз көзөмөлүнө алды", — дешти ТИМден.

Белгилей кетсек, коронавирустан улам Кыргызстан дагы Кытай, Түштүк Корея, Япония, Иран жана Италиядан жарандардын кирүүсүнө тыюу салган. Чектөө акыркы 20 күн эпидемиологиялык кырдаал начар болуп турган өлкөлөрдөн келгендерге да тиешелүү. Аталган өлкөлөрдөн келген жарандардын баары эки жумалык карантинден өтүүгө тийиш. Тизме абалга жараша кошумчаланышы мүмкүн. Кыргызстанга учуп келген жарандар текшерүүгө самолеттон алынууда.