БИШКЕК, 2-мар. — Sputnik. Өкмөттүн маалымат кызматы 1-марттан тарта жалпы жарандык паспорту жок жарандар Кыргызстандын аймагына кантип кирерин түшүндүрүп берди.
Эске салсак, өкмөт дүйнөгө тарып жаткан коронавирустан улам 1-марттан тарта Кыргызстанга ID-карта менен кирүүгө убактылуу тыюу салган. Мындай чечимдин негизги максаты — коопсуздукту сактоо жана өлкө чек арасынан өткөрүү учурда көзөмөлдөөнү күчөтүү. Анткени буга чейин айрымдар эпидемиологиялык кырдаал начар болгон өлкөлөрдөн Москвага келгенин жашырып, Кыргызстандын чек арасынан ID-карта менен өтүүгө аракет жасаган кыргызстандыктар кармалган.
Өкмөттөн билдиришкендей, жалпы жарандык паспорту жок жарандар ID-карта менен өтө алышат. Болгону алар бир катар атайын процедуралардан өтүүгө милдеттүү болот.
"Жалпы жарандык паспорттун бар-жогун жаран кирип келе жатканда чек ара кызматкери Мамлекеттик каттоо кызматынын электрондук системасы аркылуу текшерет. Буга бир аз убакыт талап кылынат. Эгер чындап эле мурда андай паспорт албаган болсо, дароо өткөрүлөт. Эгер система бул документти алганын көрсөтүп койсо, анда абал такталып, иштин чоо-жайы билинмейинче жаран кармалып турат", — деп айтылат түшүндүрмөдө.
Ал эми паспорттун эки түрү тең бар, бирок авиабилеттерди алдын ала ID-карта менен алып алгандар эч нерседен кам санабай учуп келип, бул жактан жалпы жарандык паспортун көрсөтсө болот.
Белгилей кетсек, Тышкы иштер министрлиги кыргызстандыктарга Япония, Түштүк Корея, Иран, Италия, Кытайга барбай туруу жана бул мамлекеттердин жарандарын Кыргызстанга киргизбөө сунушталган.
Азыр бул жактан келген кыргызстандыктар эки жумалык карантинге киргизилип жатат.
