Салымбеков: дүйнө элинин көңүлүн мөңгүлөрдү сактоого буруу зарыл
Кыргызстан мөңгүлөрдүн мекени десек болот. Учурда климаттын өзгөрүшү менен кыйроого учурап жаткан мөңгүлөрдү сактоого дүйнө элинин көңүлүн бурдуруу зарылчылыгы жаралууда. Бул тууралуу Аскар Салымбеков Sputnik Кыргызстан радиосунун таңкы эфиринде маек куруп жатып билдирди.
Анын айтымында, дүйнө коомчулугунун көңүлүн бул маселеге бурдуруу максатында ушул жылдын 26-февралында эл аралык деңгээлдеги конференция өтөт.
"Азыр акылы тетик, билими бар бардык эле адам бул көйгөйдү түшүнүп турат. Тактап айтканда, климаттын ысышы, өндүрүштүн дагы башка адамдык аракеттердин мөңгүлөргө тийгизген терс таасири эбегейсиз зор болууда. Бул маселе өзгөчө биздин өлкө үчүн курч турат, анткени Кыргызстан мөңгүлөрдүн мекени. Мөңгүлөрдүн эриши менен келечекте суу таңсыктыгы пайда болушу мүмкүн. Бул өз кезегинде энергетикага да зыянын тийгизет. Айтор, азыртадан кайдыгерликти токтотуп, мөңгүлөрдү сактап калууга олуттуу аракеттерди башташыбыз керек. Бишкекте өткөрүлүүчү конференция мына ушул максатты көздөйт. Жалпы дүйнө коомчулугуна, төгөрөктүн төрт бурчундагы бул багыттагы адистерге мына ушундай көйгөй көрүнүп турганын жеткирүү үчүн уюштурулуп жатат. Бул ирет Борбор Азия, Россиядан коноктор келиши күтүлүүдө. Кийинки жылдары мөңгүлөр андан ары уланып кеткен Кытай, Пакистан, Индия жана башка мамлекеттерден да чакырабыз деп ойлойм", — деди Салымбеков.
Меценат аталган конференцияга колдоо көрсөтүү боюнча кайрылуу түшкөндө жаран катары да бул көйгөйгө четте карап тура албагандыгын кошумчалады.
