Дастан Жумабековдун кеңешчиси. "Унаанын" жаңы директору тууралуу эмне белгилүү

БИШКЕК, 23-фев. — Sputnik. "Унаа" мамлекеттик ишканасына директор болуп Марат Пирназаров дайындалды. Sputnik Кыргызстан агенттиги анын эмгек жолун билүүгө кызыкты.

Пирназаров 40 жашта, Ош облусунун Кара-Суу районуна караштуу Эшме айылында туулган.

Пирназаров Финансы рыногун жөнгө салуу жана көзөмөлдөө мамлекеттик кызматынын төрага орун басары кызматында беш жарым жыл иштеген. 2017-жылдын ноябрь айында ошондогу премьер-министр Сапар Исаковдун буйругу менен кызматтан бошотулган.

Соңку учурда  Жогорку Кеңештин төрагасы Дастан Жумабековдун кеңешчиси болуп иштеп жаткан.

Юстиция министрлигинин расмий сайтында Марат Пирназаров бир нече компаниянын жетекчиси экени айтылат.

Алар төмөнкүлөр:

• "Наристе-Инвест" акционердик инвестициялык фонду;
• "УК ИРБИС" Ачык акционердик коому;
• "Золотая Фортуна" ААК;
• "Белая Гора" ААК;
• "ВИТА Люцерна" ААК;
• "БарсЭнерго" ААК.

2010-жылы мамлекеттик кызматка өткөндөн кийин жогорудагы компаниялардын директорлугунан бошотулган.

"Унаанын" тарыхы

2018-жылдын аягында Маалыматтык кызматтардын адистештирилген борбору жана Унаа каражаттары менен айдоочулук курамды каттоо департаменти жоюлган. Анын базасында жаңы "Унаа" мамлекеттик ишканасы түзүлгөн. Бул мекеме автоунааларды каттап, айдоочулук күбөлүк берет. Биринчи директор Марс Саккараев директор болуп төрт ай иштегенден кийин Аламүдүн районуна аким болуп кеткен. Анын ордуна 2019-жылдын июль айында Алымжан Козубаев келип, жети ай иштеди. Анын алешем иштерин Коопсуздук кеңеши аныктап чыккандан кийин ал кызматтан алынган. Ошондой эле ага карата сотко чейинки өндүрүш ачылган.

Андан мурдараак Sputnik Кыргызстан агенттиги Козубаевдин кадр маселесинде шек жараткан коррупциялык иштери тууралуу материал даярдаган.