БИШКЕК, 20-фев. — Sputnik. Жети-Өгүз районуна караштуу Оргочор айыл өкмөтүнүн Боз-Бешик кыштагында 15 түтүн калың кардан эч жакка каттай албай калды. Бул тууралуу Sputnik Кыргызстан агенттигине жергиликтүү жашоочу Мирлан Тынымсейитов билдирип, ал жактан сүрөт, видео жөнөткөн.
Анын айтымында, эки күндөн бери калың кардан улам балдар да мектепке чыга албай калышкан.
Жети-Өгүз районуна караштуу Оргочор айыл өкмөтүнүн Боз-Бешик кыштагында 15 түтүн калың кардан эч жакка каттай албай калды
© Фото / Мирлан Тынымсейитов
"Эки күн мурда кар жаап, Боз-Бешик айылынан үч чакырым ылдый жактагы жолго бороон үйлөп салган. Ал жакта 15тей түтүн жашайт. Каттам токтоп калып, автоунаалар карга тыгылган боюнча чыга албай турушат. Жолдогу кардын калыңдыгынан балдар эмес, ат да баса албай калды. Маселеге айыл өкмөтү көңүлкош мамиле жасап жаткандай. Болбосо эки күндүн ичинде чечмек да", — деди Тынымсейитов.
Оргочор айыл өкмөтүнүн өкүлү Муктар Касенов маселени боюнча иштеп жатышканын айтты
© Фото / Мирлан Тынымсейитов
Оргочор айыл өкмөтүнүн өкүлү Муктар Касенов маселе боюнча иштеп жатканын айтты.
"Жол кечээтен бери тазаланып жатат. Тургундар айтып жаткан жакты тазалоого чоң техника керек экен. Аны бүгүн жөнөтүп жатабыз. Эртеңкиге чейин маселе чечилип, жашоочуларга шарт түзүлөт", — деп ишендирди Касенов.
Баса, Чолпон-Атада 19-февралга караган түнү катуу кар жаап, бийиктиги 60 сантиметрге жеткен. Жергиликтүүлөрдүн айтымында, акыркы 10 жыл аралыгында мынчалык көп кар жааган эмес.
