Өлкөдө электр энергиясына болгон суроо-талап өсүп жатат. Ошондуктан бул тармакка инвестиция тартуу зарыл. Бул тууралуу Абдылда Исраилов "Гидроэнергетика. Борбордук Азия жана Каспий — 2020" конгрессинде Sputnik Кыргызстан радиосуна маек куруп жатып билдирди.
Анын айтымында, өтүп жаткан конгресс инвестиция тартууга негизги аянтча боло алат.
"Электр энергиясына муктаждыктын өсүүсүнө бир нече себеп бар. Биз жергебиздин гидроэнергетикалык потенциалы абдан жогору экенин айтып келебиз. Ошондуктан инвестиция тартуу үчүн ушундай аянтчаларды колдонушубуз зарыл. Мисалы, бизде Нарын дарыясында Камбар-Ата-1 ГЭСин курса болот. Ал долбоордун кубаттуулугу 2 миң мегаваттка жетет. Ага инвестор табылып курулуп калса, өлкөдөгү суу жана электр энергиясына болгон муктаждык маселеси чечилип калат. Мындан тышкары, майда сууларга бай өлкөбүз. Демек чакан жана орто ГЭСтерди курушубуз керек. Ошондой эле убагында тургузулган Киров, Папан суу сактагычтарынан электр энергиясын алып, колдонуу мүмкүнчүлүгү бар", — деди Исраилов.
Энергетик чакан ГЭСтер экологияга таасирин тийгизбей турганын белгилеп, бул багыт ички инвесторлордун дагы кызыгуусун жаратып жатканын кошумчалады.
Белгилей кетсек, Бишкекте 19-февралда "Гидроэнергетика. Борбордук Азия жана Каспий — 2020" конгресси өз ишин баштаган. Анда гидроэнергетика тармагындагы ири компаниялар өз продукцияларын көрсөтүүдө. Аталган иш-чара эки күнгө уланып, ушуну менен төртүнчү ирет өтүп жатат.
