БИШКЕК, 12-фев. — Sputnik. "Бишкек" эркин экономикалык аймагына кайтып келген кытай жарандары карантинде кармалууда. Бул тууралуу аталган аймактын маалымат катчысы Кыялбек Эсеналиев билдирди.
Анын айтымына караганда, эркин экономикалык аймагында Кытайдын 186 жараны каттоодон өткөн.
"Алардын 135и Кыргызстандан чыгып кеткен. Кийин 32си кайтып келди. Экөө мамлекеттик изолятордо, тест алардын вируска кабылбаганын көрсөтүүдө. Калган 30 кытай жараны келгенден бери ЭЭАнын аймагында карантинде", — деди Эсеналиев.
Ал ошондой эле мекенинен кайткан кытай жарандары ЭЭАнын аймагында ээн-эркин жүргөнү боюнча маалымат чындыкка дал келбей турганын кошумчалады.
Кытай бийлиги 2019-жылдын 31-декабрында Дүйнөлүк саламаттыкты сактоо уюмуна (ДСУ) өлкөнүн борбордук бөлүгү Ухань шаарында белгисиз пневмония оорусу күч алганын билдирген. Адистер оорунун козгогучу коронавирус nCoV 2019 экендигин аныктап, эл аралык деңгээлдеги өзгөчө кырдаал деп жарыялаган.
10-декабрга карата маалыматта Кытайда коронавирустан каза тапкандардын саны 1016га жетти. Ал эми жалпы жуктуруп алгандардын саны 42 638 болсо, сакайып кеткендер 3996 киши экени айтылды.
