БИШКЕК, 7-фев. — Sputnik. Ишемби күнү Кытайдан чыга албай жаткан кыргызстандык айдоочулар мекенине кайтарылат. Бул тууралуу айдоочулардын көз карандысыз профсоюзунун төрага орун басары Игорь Голубев билдирди.
Эскерте кетсек, буга чейин алардын беш күндөн бери Кытайдан чыга албай жатканы маалымдалган. Айдоочулар жүктү таштап кете берүүнү сунуштаган, бирок кытай тарап андай буйрук болгон эмес деген жүйө менен макулдугун бербей келген.
Профсоюз өкүлүнүн айтымында, коронавирустан улам Кытайдагы абал курчуганына байланыштуу ал жакта кыргызстандык 54 айдоочу калып калган.
“Ушу тапта биздин ТИМ жана Үрүмчүдөгү консулдук жигердүү иштеп жатат. Дипломаттар бул татаал маселени чечүүгө жардамдашууда. Үрүмчү менен Тогодон бардыгын алып чыктык, болгону сегиз киши калды. Алардын бири жол кырсыгына кабылып, документин алдырып жибериптир, бул маселе боюнча да териштирүү жүрүп жатат”, — деди Голубев.
“Алар жети айдоочуну алып чыгат. Тилекке каршы, бирөө азырынча калып турмай болду. Кытай тарап шаршембиге чейин бардык маселени чечип берүүнү убадалады”, — деди Голубев.
Акыркы маалымат боюнча, Кытайда коронавирусту жуктуруп алгандардын саны 31 миңден ашты, анын 636сы каза болгон. Кытайдан башка жакта ооругандардын саны 190 болсо, анын бири көз жумган. Дүйнөлүк саламаттыкты сактоо уюму илдетти эл аралык маанидеги көйгөй деп тапкан.
