Өмүрбеков: сексуалдык ыдык көргөн балдардын психикасы жабыркайт
Ар дайым ур-токмокко же сексуалдык зордук-зомбулукка кабылган балдар психикалык жактан абдан жабыр тартат. Бул жагдай алардын кийинки жашоосуна дагы терс таасирин тийгизет. Бул тууралуу Талант Өмүрбеков Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, көп ирет сексуалдык кордук көргөн балдардын ден соолугу хирургиялык жардамга муктаж болуп калат.
"Бир баланы апасы ур-токмокко ала берип, алты жолу ооруканага келип түштү. Ал чоңойгондо өз балдарына дагы ошондой мамиле жасайт. Өзгөчө сексуалдык зомбулукка кабылгандар башкача болуп өзгөрүп калганын көрүп жүрөбүз. Хирургиялык жардам кылабыз, бирок аларга психологиялык дагы жардам көрсөтүлүшү зарыл", — деди Өмүрбеков.
Ошондой эле ал мэрияга караштуу Балдарды коргоо борбору зордук-зомбулуктан жабыр тарткан балдарга психологиялык жана юридикалык жардам бере турганын кошумчалады.
