БИШКЕК, 6-фев. — Sputnik. Мамлекет башчы Сооронбай Жээнбеков Ысык-Ата районунун жашоочулары менен жолугушуу учурунда Кыргызстандын бардык аймактары таза суу менен камсыз болорун айтты. Бул тууралуу президенттин маалымат кызматынан билдиришти.
Жээнбеков акыркы жылдары 107 айылга таза суу жеткенин белгилеп, эл аралык финансылык институттардын каржылоосу менен 588 айылдын тизмеси түзүлгөнүн кошумчалады.
"2024-жылга чейин 715 айылда курулуш иштерин бүтүрүп, инфраструктураны жаңылоо зарыл. Көрсөтүлгөн мөөнөт ичинде өлкөнүн бардык аймактары таза суу менен камсыз болот", — деди Жээнбеков.
Президенттин маалымат кызматы калкты таза суу менен камсыздоо боюнча долбоорлорду ишке ашырууга республикалык бюджеттен жыл сайын каражат бөлүнүп, эл аралык өнөктөштөрдөн инвестиция тартуу боюнча жигердүү иштер аткарылып жатканын белгилешти.
