БИШКЕК, 13-янв. — Sputnik. Белгилүү балбандар Калы Сулайманов менен Жоламан Шаршенбеков грек-рим күрөшү боюнча Кыргызстандын чемпионатынын финалында кез келди.
Алар 60 килограмм салмак категориясы боюнча күч сынашты. Экөөнүн күрөшү мелдештин бүйүр кызыткан кармаштарынын бири болду. Аталган видео Instagram тармагындагы Prosports_kyrgyzstan баракчасына жүктөлгөн.
Посмотреть эту публикацию в Instagram
Оюндун биринчи бөлүгүндө Шаршенбеков чабал иштегени үчүн айыпка жыгылып, атаандашына бир упай берилди. Сулайманов мындай мүмкүнчүлүктү текке кетирбей, төрт упайга иштеди. Ошентип биринчи бөлүк 5:0 эсеби менен аяктады. Ал эми экинчи бөлүктө Сулайманов чабал аракет жасаганы үчүн айыпка жыгылды. Бирок Шаршенбеков бул партерден натыйжа көрсөтө алган жок. Деген менен андан соң каршылашынын артына өтүү ыкмасын жасоо менен эки упай алды. Мындан кийинки аракеттеринен майнап чыккан жок.
Бул чемпионатта алдыңкы орунду алып, мыктылыгын көрсөткөн балбандардан Кыргызстандын улуттук курама командасы түзүлөт. Алар Азия чемпионатына жана башка дүйнөлүк мелдештерге катышып, быйыл Токиодо өтө турган Олимпиадага лицензия алуу үчүн күрөшмөкчү.
Грек-рим күрөшү боюнча байгеге ээ болгон балбандардын тизмесин бул жактан көрө аласыздар.
